تجربتى لصناعة
صابون المواعين فى البيت , منتديات ملتزمون
اهلا حبيباتى عايزة اقلكم على
صابون المواعين بتاعى آه اصل انا فرحانة بيه قوى
نا كنت بحوش زيت القلى اللى بغيره بتاع السمك وقلى الفلفل والفراخ والكرنبيت كله كله
صفيته وعنته لحد ما وصل للتر ونص
عملت ايه جبت ربع كيلو دقيق من البيت اى دقبق وحتى ممكن يكون مسوس او كمان مدود تنخليه تشتغلى به ماشى .
اشتريت ربع كيلو بوتاس من اللى بيتعمل به الصابون تلاقيه عامل زى جوز الهند القشور
وكمان كوب او اتنين ماء وعشان
صابون يكون ناعم على ايدى حطيت جلسرين
جيت بقى للريحة بتاع
الصابون كان عندى قشر برتقال زوت عليه كم ليمونة وغليتهم كويس وصفيتهم حلو اوى تمام كده تعالى بقى نطبق الطبخة
انا خلط الدقيق مع الزيت على النار عشان يبقى دافى شوية وبعدين دوبت البوتاس فى الماء خلى بالك على نفسك وحطى زجاجة الخل جنبك وانتى بتشتغلى لو حصل ان البوتاس لمسك اوعى تغسلى بالماء عشان هتزود التفاعل اغسلى بالخل والحاجات اللى راح تدوبى فيها البوتاس وتكملى شغل الصابون لازم تكون بلاستك
والبوتاس دافى كده نضيف عليه الزيت اللى معاه الدقيق عشان هم فى نفس درجة الحرارة
تقلبى كويس قوى لحد ما يتقل وبعدين تضيفى بقى الجلسرين باى كمية انت عاوزة تحطيها وتحطى ريحة اليمون اللى عملتيها كده خلاص اتركيه بقى بعيد عن العيال فى حتة كويسة لحد تانى يوم عشان الصابون يخمر
بعد كده اذا كنت عايزة الصابون سائل زودى الماء واحدة واحدة وقلبى لحد لما تحسى بالقوام اللى انت عازاه كل ده بعد ما يخمر ماشى حطيه بقى فى جركن او زجاجات مياه قديمة عندك واسحبى منه براحتك
انا غسلت به الاحواض الصينى والسيراميك وقاعدة الحمام روعة والله وكمان نقعت فيه بنطلون ابنى كان كله شحم اصبح تانى يوم زى الفل جربيه وادعيلى بعدها
آه قبل ما انسى عاوزة اقول ان ممكن بعد الخمر تصبيه فى قوالب الايس كريم او الزبادى او قوالب خشب واتركيه يوم او اتنين بالكتير راح يجف وتقدرى تقطعيه زى ما انت عايزة وتخزنيه
يارب تعجبكو الطريقة دى وتكونو استفدتو منها
اشوفكو فى موضوع جديد ان شاء الله